പ്രണയത്തെ പ്രണയിക്കുന്നവർക്ക്

 നിങ്ങളെപ്പോഴെങ്കിലും നിങ്ങളറിയാതെ നിങ്ങളെ പ്രണയിക്കുന്നവരെ കുറിച്ച് ചിന്തിച്ചിട്ടുണ്ടോ? അതൊരു സുഖമുള്ള ചിന്തയാണ്. അയാളൊരിക്കലും "നിന്നോടെനിക്ക് പ്രണയമാണ്" എന്ന് വന്ന് പറയണമെന്നില്ല. കാരണം ഒരുപക്ഷേ തൻ്റെ പ്രണയം തന്നോട് ചേർന്നലിഞ്ഞില്ലാ വണമെന്ന് അയാൾ ആഗ്രഹിക്കുന്നുണ്ടാവാം അല്ലെങ്കിൽ കാമുകനെന്നോ കാമുകിയെന്നോ ഉള്ള വിളിപ്പേരിൽ അയാൾക്ക് അറിയപ്പെടാൻ താല്പര്യമില്ലായിരിക്കാം. അങ്ങനെയും പ്രണയിക്കാമല്ലോ. 

കൈയ്യിലിരിക്കുന്ന ഫോട്ടോ നോക്കി അയാൾ പുഞ്ചിരിക്കുന്നുണ്ടാവാം, പറഞ്ഞു തീർന്ന സംഭാഷണങ്ങൾ വീണ്ടും ഓർത്തെടുത്ത് സന്തോഷിക്കുന്നുണ്ടാവാം. അയാൾ പ്രണയത്തിൽ ജീവിക്കുന്നുണ്ടാവാം.

നിങ്ങളിതൊന്നും അറിയണമെന്നില്ല. മനസിലാക്കാൻ അയാൾ അവസരം തരണമെന്നുമില്ല. 

ഒരു തവണയെങ്കിലും, ഒരു നിമിഷമെങ്കിലും അത്തരമൊരാളായി നമ്മൾ മാറിയിട്ടുണ്ടാവില്ലേ? പിന്നെ ഭയത്തിൻ്റേയും ചുറ്റുപാടിൻ്റേയും അടിമത്വത്തെ പേടിച്ച് തിരിച്ച് വന്നിട്ടുമുണ്ടാകും.

എന്തുകൊണ്ടയാൾ തൻ്റെ പ്രണയം തുറന്ന് പറയുന്നില്ല എന്നോർത്തുനോക്കിയാൽ അത് ഭയം കൊണ്ടാണെന്ന് ചിന്തിക്കുന്നവരെ കുറിച്ചല്ല പറയുന്നത്. ഇത് നിങ്ങളറിയാത്ത പ്രണയമാണ്.ഈ പ്രണയത്തിന് നിങ്ങളുടെ പുറംതോടിനേയോ അതിൻ്റെ നിറത്തേയോ അതിൻ്റെ ന്യൂനതകളേയോ കുറിച്ച് അറിയേണ്ട ആവശ്യമില്ല. നിങ്ങൾ മറ്റൊരാളുടെ സ്വന്തമാണോ എന്നതിന് പോലും ഇവിടെ പ്രസക്തിയില്ല. അയാൾക്ക് നിങ്ങൾ അയാളിലെ പ്രണയം മാത്രമാണ്. അയാളുടെ മുഖത്ത് പുഞ്ചിരി വിടർത്തുന്ന, ഓർമ്മകൾക്ക് നിറം നൽകുന്ന, പഞ്ചേന്ദ്രിയങ്ങളും ഒന്നായി തോന്നുന്ന അയാളുടെ പ്രിയപ്പെട്ട പ്രണയം.

നിങ്ങളറിയാതെ നിങ്ങളെ എത്രയെത്ര പ്രണയങ്ങൾ പിൻതുടരുന്നുണ്ടാവാം, സ്വന്തമാക്കാൻ ആഗ്രഹിക്കാതെ ദൂരെ നിന്ന് കൺനിറയെ നോക്കുന്നുണ്ടാവാം. അറിയുന്നുണ്ടോ നിങ്ങൾ, നിങ്ങളെ അയാൾ അഗാഥമായി പ്രണയിക്കുന്നുണ്ടെന്ന്? അതറിയാത്തിടത്തോളം കാലം ആ പ്രണയം നിങ്ങളുടെ കൂടെയുണ്ട്.ഒന്ന് തിരിഞ്ഞ് നോക്കിയാൽ മാത്രം മതി, നിങ്ങൾ പ്രണയമായും പ്രണയം നിങ്ങളായും മാറുന്ന ആ കാഴ്ച കാണാൻ.

-Aji